மதிலிருந்து மாளிகைக்கு (மத் 1:5,6)

 மதிலிருந்து மாளிகைக்கு

சல்மோன் போவாசை ராகாபினிடத்தில் பெற்றான் போவாஸ் ஓபேதை ரூத்தினிடத்தில் பெற்றான் ஓபேத் ஈசாயை பெற்றான் ஈசாய் தாவீது ராஜாவைப் பெற்றான். தாவீது ராஜா உரியாவின் மனைவியாயிருந்தவளிடத்தில் சாலொமோனைப் பெற்றான். (மத் 1:5,6) 

கிறிஸ்துவின் பிறப்பு ராஜ்யத்திற்குப் புறம்பாகக் கிடந்த நம்மை ரஜாக்களாக மாற்றினது மாளிகைக்கு உள்ளே நம்மை கொண்டுசெல்லவே, மாளிகைக்கு வெளியே அவர் பிறந்தார். ராகாப் என்னும் வேசியின் வீடு அலங்கத்தின் மதிலில் இருந்தது அலங்கத்திலே அவள் குடியிருந்தாள் (யோசு. 2:15). நூனின் குமாரனாகிய யோசுவா சித்தீமிலிருந்து வேவுகாரராகிய இரண்டு மனுஷரை இரகசியமாய்வேவுபார்க்கும்படி அனுப்பி: நீங்கள் போய் தேசத்தையும் எரிகோவையும் பார்த்துவாருங்கள் என்று சொன்னபோது, அவர்கள் போய், ராகாப் என்னும் பெயர்கொண்ட வேசியின் வீட்டுக்குள் பிரவேசித்து, அங்கே தங்கினார்கள் (யோசு. 2:1). எரிகோவை வேவுபார்க்க யோசுவா அனுப்பின ஆட்களை ராகாப் என்னும் வேசி மறைத்துவைத்தபடியினால், அவளையும் அவள் தகப்பன் வீட்டாரையும் அவளுக்குள்ள யாவையும் யோசுவா உயிரோடே வைத்தான் அவள் இந்நாள்வரைக்கும் இஸ்ரவேலின் நடுவிலே குடியிருக்கிறாள் (யோசு 6:25) என்று வாசிக்கின்றோமே. அலங்கத்தின் மேல் 'வேசியாக' வாழ்ந்துகொண்டிருந்த அவள், இஸ்ரவேலின் நடுவிலே வாழும்படியாக குடிபெயர்ந்துவிட்டாளே. ஆண்டவரே, நீர் உம்முடைய ராஜ்யத்தில் வரும்போது அடியேனை நினைத்தருளும் என்று கள்ளன் ஒருவன் வேண்டிக்கொண்டபோது, இயேசு அவனை நோக்கி: இன்றைக்கு நீ என்னுடனேகூடப் பரதீசிலிருப்பாய் என்று மெய்யாகவே உனக்குச் சொல்லுகிறேன் (லூக் 23:42,43) என்று சொன்னாரே. மரணத்தருவாயில், கடைசிநேரத்தில் மனந்திரும்ப அந்தக் கள்ளனுக்குக் கிடைத்த வாய்ப்பினைப்போலவே, பட்டணத்தின் எல்லையில் குடியிருந்த ராகாப் என்னும் வேசியின் வாழ்க்கையும் வேவுக்காரர்களால் தப்புவிக்கப்பட்டது. 

ஆனபடியினால் முன்னே மாம்சத்தின்படி புறஜாதியாராயிருந்து, மாம்சத்தில் கையினாலே செய்யப்படுகிற விருத்தசேதனமுடையவர்களால் விருத்தசேதனமில்லாதவர்களென் னப்பட்ட நீங்கள், அக்காலத்திலே கிறிஸ்துவைச் சேராதவர்களும், இஸ்ரவேலுடைய காணியாட்சிக்குப் புறம்பானவர்களும், வாக்குத்தத்தத்தின் உடன்படிக்கைகளுக்கு அந்நியரும், நம்பிக்கையில்லாதவர்களும், இவ்வுலகத்தில் தேவனற்றவர்களுமாயிருந்தீர்களென்று நினைத்துக்கொள்ளுங்கள் (எபே. 2:12) என்று நமது முந்தைய நிலையை பவுல் சுட்டிக்காட்டுவதுடன், நம்மிடத்தில் அன்புகூர்ந்து, தமது இரத்தத்தினாலே நம்முடைய பாவங்களறநம்மைக் கழுவி, தம்முடைய பிதாவாகிய தேவனுக்குமுன்பாக 'நம்மை ராஜாக்களும் ஆசாரியர்களுமாக்கின' அவருக்கு மகிமையும் வல்லமையும் என்றென்றைக்கும் உண்டாயிருப்பதாக (வெளி 1:6) என்று தற்போதைய நிலையையும் வேதம் சுட்டிக்காட்டுகின்றதே. 

எனினும், மீண்டும் மதிலுக்கு நேராக இழுக்கும் பாவங்களுக்கு நாம் எச்சரிக்கையாயிருக்கவேண்டும். ராகாபின் வம்சத்தில் பிறந்த தாவீது மீண்டும் மதிலுக்கு நேராக இழுக்கப்பட்டான். ஒருநாள் சாயங்காலத்தில் தாவீது தன் படுக்கையிலிருந்து எழுந்து, அரமனை உப்பரிகையின்மேல் உலாத்திக் கொண்டிருந்தபோது, ஸ்நானம்பண்ணுகிற ஒரு ஸ்திரீயை உப்பரிகையின் மேலிருந்து கண்டான் அந்த ஸ்திரீ வெகு சௌந்தரவதியாயிருந்தாள். அப்பொழுது தாவீது, அந்த ஸ்திரீ யார் என்று விசாரிக்க ஆள் அனுப்பினான் அவள் எலியாமின் குமாரத்தியும், ஏத்தியனான உரியாவின் மனைவியுமாகிய பத்சேபாள் என்றார்கள். அப்பொழுது தாவீது ஆள் அனுப்பி அவளை அழைத்து வரச் சொன்னான் அவள் அவனிடத்தில் வந்தபோது, அவளோடே சயனித்தான் பிற்பாடு அவள் தன் தீட்டு நீங்கும்படி சுத்திகரித்துக்கொண்டு தன் வீட்டுக்குப் போனாள் (2சாமு 11:2-4). என்றபோதிலும், தீர்க்கதரிசியாகிய நாத்தானை அனுப்பி, சிங்காசனத்திலிருந்த தாவீதை மீண்டும் சீர்ப்படுத்தினார். தவற்றினை உணர்ந்தவனாக, தேவனண்டை வந்தபோது 'ராஜா' என்னும் ஸ்தானத்தில் மீண்டும் உறுதிப்படுத்தப்பட்டான் தாவீது. 

பாவத்திலிருந்தும், உலகத்தின் பல்வேறு அடிமைத்தன பழக்கவழக்கங்களிலிருந்தும் இயேசு கிறிஸ்துவின் இரத்தத்தினால் விடுதலையாக்கப்பட்டு, ராஜாக்களாக நாம் மாற்றப்பட்டிருக்கின்றோமே என்றபோதிலும், தேவராஜ்யத்தின் நடுவிலிருந்து மீண்டும் எல்லைக்கு வெளியே நம்மைத் தள்ளிவிடுவதற்கு சத்துரு செய்யும் சதிகளில் நமது கால்கள் சிக்கிக்ககொள்ளவேண்டாம். மாளிகையிலிருந்து மீண்டும் மதிலுக்குக் கொண்டுசெல்லும் பிசாசின் தந்திரங்களுக்கு நாம் எச்சரிக்கையாயிருப்போம்.